Malampusong gipahigayon sa Lokal nga Pangagamhanan ang pagpang-apod-apod sa pinansyal nga ayuda ngadto sa mga motorela drivers niadtong Mayo 28, 2026, didto sa Robinsons Valencia, Valencia City, Bukidnon.
Mokabat sa 800 ka mga benepisyaryo ang nakadawat og ₱1,500 matag usa pinaagi sa Assistance to Individuals in Crisis Situation (AICS) – Subsistence Financial Support Program. Ang maong lakang kabahin sa padayon nga paningkamot sa dakbayan sa paghatag og suporta ug dinaliang tabang ngadto sa mga sektor nga adunay dakong papel sa adlaw-adlaw nga transportasyon ug ekonomiya sa siyudad.
Ang malampusong implementasyon sa maong programa nahimo pinaagi sa hugot nga koordinasyon sa CMO Assistance Office, City Social Welfare and Development Office (CSWDO), City Treasurer’s Office, ug sa Barangay Community Leaders Association (BCLA).
Ang maong kalihokan usa ka inisyatiba sa Lokal nga Pangagamhanan sa Valencia sa liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez. Kini nagpamatuod sa ilang padayon nga dedikasyon sa pag-atiman ug pagpakabana sa katawhan, ilabi na sa mga mamumuo sa sektor sa transportasyon.
Gipadayag sa lokal nga pangagamhanan ang ilang tinguha nga mas mapalapad pa ang mga programang makatabang sa mga ordinaryong mamumuo ug magpadayon sa pagdala og serbisyo nga direkta nga mabati sa tibuok katawhan sa Valencia.
PIAD | Jay Fernandez-Ara
Videos | Carl Tradz