UBAY-UBAY nga mga upland farmer groups ning dakbayan ang midawat sa Hybrid Yellow Corn Seeds kon NK6505 VIP ug Bio-Fertilizer kon BIO N gikan sa buhatan sa Department of Agriculture RFO-10 pinaagi sa Agricultural Productivity Operations Office (APOO).
Nagsugod ang maong distribusyon niadtong Hunyo 5 ug 8 ning tuig diin nangulo ang Agronomy ug Field Operations Division sa APOO sa distribusyon niini ngadto sa mga farmer associations gikan sa upland barangays sama sa Baikingon, Canitoan, Iponan, Lumbia, Pagatpat, Pagalungan, San Simon, ug Taglimao.
Aduna usab laing ditribusyon sa susamang agricultural inputs ngadto sa barangay Besigan, Dansolihon, ug Tigapoloan nga mga mag-uuma nga gipahigayon adlaw’ng Martes (Hunyo 9).
Gani, ang APOO magpahigayon usab og lain pang hugna sa pagpangapod-apod sa corn seeds ug bio-fertilizer karong umaabot Hunyo 16 diin ang mga benepisyaryo gikan sa barangay Agusan, Balubal, Bugo, Cugman, F.S. Catanico, Gusa, Indahag, Puerto, ug Tablon nga mga farmer association.
