Mitambong ang mga miyembro sa Barangay Patpat VIGO Livestock Farmers Association sa tulo ka adlaw nga Training on Carabao Production and Management nga gipahigayon sa Agricultural Training Institute – Regional Training Center X (ATI-RTC X) uban sa Department of Agriculture – Regional Field Office X (DA-RFO X) niadtong Hunyo 2–4, 2026 sa Abellanosa Agricultural Learning Site Inc., San Francisco, Don Carlos, Bukidnon.
Ang maong pagbansay kabahin sa capability-building interventions alang sa mga benepisyaryo sa Carabao Multiplier LEED Project aron masiguro ang malampusong implementasyon ug pagpadayon sa proyekto sa pag-atiman og kahayupan.
Nirepresentar sa asosasyon si Mr. Gary D. Campomanes, presidente sa Barangay Patpat VIGO Livestock Farmers Association, uban sa mga benepisyaryo gikan sa nagkadaiyang lugar sa Northern Mindanao.
Gihisgutan sa training ang hustong pagdumala sa carabao lakip ang breeding ug genetics, pagpili og dekalidad nga breeding stocks, feeding ug nutrition management, housing facilities, animal health care, disease prevention, ug uban pang best management practices.
Ang Barangay Patpat VIGO Livestock Farmers Association usa ka benepisyaryo sa Carabao Multiplier LEED Project nga nagkantidad og Php 2.4 milyon nga nagtumong sa pagpalig-on sa livestock production ug pagdugang sa income opportunities sa mga miyembro niini.
Matod ni Mr. Campomanes, dako ang natabang sa training sa pagpalambo sa iyang kahibalo sa hustong pag-atiman ug pagdumala sa carabao. Nagpasalamat usab siya sa ATI ug DA alang sa mga kahibalo ug practical skills nga ilang nadawat nga makatabang sa kalampusan ug pagpadayon sa proyekto sa asosasyon.
Nahimong posible ang maong higayon pinaagi sa suporta sa Department of Agriculture ug sa City Government of Malaybalay ubos sa liderato ni Mayor Jay Warren R. Pabillaran pinaagi sa Livestock Intensification and Development Program nga gipangulohan ni Dr. Omar T. Cahanap, Livestock Program Officer.
Ni: Dr. Omar T. Cahanap, CVO-NADA