Ubos sa hiniusang liderato ni City Mayor Amie G. Galario ug Vice Mayor/Presiding Officer Greizl Galario-Fernandez, paspas ug malampuson nga giaksyonan sa 10th Sangguniang Panlungsod (SP) sa Valencia ang nagkalain-laing mahinungdanong resolusyon ug ordinansa alang sa padayong kalamboan sa sektor sa panglawas, agrikultura, ug kaluwasan sa publiko. Kining mga lakang pormal nga giduso ug gipasa atol sa ika-42 nga Regular Session kaniadtong Hunyo 15, 2026.
Isip pagpakita sa lig-on nga pakighiusa ug pagtinabangay sa isig ka-LGU, dinaliang giaprubahan sa konseho, human kini giklasipikar isip urgent ni Mayor Galario, ang paghatag og usa ka milyon ka pesos (PhP 1,000,000.00) nga pinansyal nga tabang alang sa mga biktima sa linog sa General Santos City. Ang maong pondo pagakuhaon gikan sa Local Disaster Risk Reduction and Management (LDRRM) Fund sa dakbayan.
Gidawat usab sa Unang Pagbasa ang Proposed Memorandum of Agreement (MOA) tali sa LGU Valencia ug sa CURE Philippines, Inc. (Tebow CURE Children’s Hospital of the Philippines). Pinaagi niini, makadawat og libre ug espesyalistang operasyon ug serbisyong medikal ang mga kabataan nga adunay orthopedic deformities, cleft lip and palate, ug uban pang reconstructive surgical needs.
Giaprubahan usab ang pag-amendar sa mga detalye ug specifications sa duha (2) ka unit sa PTVs ubos sa LDRRM Fund CY 2025 aron mas mapalambo ang operasyon ug pagresponde sa mga emerhensya.
Sa sektor sa edukasyon, giaprubahan sa Ikaduhang Pagbasa ang Proposed Ordinance No. 46-2026 nga nag-update sa Medical Education Subsidy Program sa dakbayan aron mas mapalapad pa ang suporta sa mga estudyante nga nagkuha og kurso sa medisina.
Gihatagan usab sa konseho og katungod si Mayor Galario sa pagpirma sa MOA uban sa Department of Agriculture (DA-RFO 10) ug sa Camiling-Malwak Irrigators Association (CMIA) alang sa pagpatuman sa Walk-Behind Rice Transplanter Project nga nagkantidad og PhP 560,000.00. Ang maong makinarya nagtumong sa pagpausbaw sa produksyon sa humay ug pagpadali sa proseso sa pagtanom alang sa mga lokal nga mag-uuma.
Samtang, giduso ni Councilor Mauricio S. Sistoso Jr. ang Proposed Ordinance No. 45-2026 nga nagdili sa mga establisemento sa negosyo sa pagpasulod sa mga menor de edad nga estudyante sa panahon nga adunay suspensiyon sa klase tungod sa kalamidad ug emerhensya aron masiguro ang ilang kaluwasan. Ang maong balaodnon gi-refer ngadto sa Committee on Laws and Women ug Committee on Education alang sa mas lawom nga pagtuon.
Gisusi ug gi-refer usab sa mga komite ang tinuig ug supplemental nga mga budget sa nagkalain-laing barangay ug Sangguniang Kabataan (SK) aron masiguro ang padayon, hapsay, ug inklusibong kalamboan sa mga komunidad.
Kining mga proaktibong lakang nagpakita sa tinud-anay nga dedikasyon ug lig-on nga pagtinabangay tali sa Ehekutibo ug Lehislatibong Kagamhanan sa Valencia City sa paghatag og dinalian, dekalidad, ug malungtarong serbisyo publiko alang sa tanang katawhan.
PIAD | Jay Fernandez-Ara
Photos: Emon Selorio