Aron masiguro ang kalidad nga pag-atiman ug edukasyon sa mga kabataan, malampusong nagpahigayon sa ilang 2nd Quarter Federation Meeting ang mga Child Development Workers (CDWs) sa Malaybalay City niadtong Hunyo 2, 2026 sa Nabialan Child Development Center sa Barangay San Martin, Malaybalay City, Bukidnon.
Gitambongan ang maong tigum sa 21 ka opisyal sa Child Development Workers Federation, lakip ang mga Pangulo, Bise-Presidente, ug sekretarya gikan sa pito ka distrito sa dakbayan.
Atol sa panagtigom, gihisgutan ang mga bag-ong update sa Early Childhood Care and Development (ECCD), kahimtang sa enrolment sa mga Child Development Centers, ug ang tukmang pagsumite sa masterlist sa mga bata.
Gisgutan usab ang pinansyal nga tabang alang sa Bayanihang Bulilit Program, lakip ang husto nga paggamit sa pondo ug pagsumite sa liquidation report.
Gipresentar usab ang mga giya alang sa ika-16 nga siklo sa Supplemental Feeding Program diin adunay init nga pagkaon gikan Lunes hangtod Biyernes ug alternatibong pagkaon alang sa katapusan sa semana.
Giplano usab ang Parents’ Orientation ug gikompirma nga sa Hunyo 15, 2026 magsugod ang klase sa mga Child Development Centers sa Malaybalay.
Natapos ang tigum uban sa lig-on nga panaghiusa ug pasalig sa mga Child Development Workers sa pagpadayon sa paghatag og kalidad nga serbisyo aron masuportahan ang hustong pagtubo ug kalamboan sa mga kabataan sa dakbayan.
Report: CSWDO-NADA