Gitukod ang Incident Management Team (IMT) isip kabahin sa komprehensibong pagpangandam alang sa ika-27 nga T’nalak Festival ug ika-60 nga Foundation Anniversary sa Probinsya sa South Cotabato nga pagasaulogon gikan Hulyo 1 hangtod 19, 2026.
Ang pag-organize sa IMT gipangunahan sa Office of the Provincial Disaster Risk Reduction and Management Officer (PDRRMO) ubos sa liderato ni Mr. Rolly Doane C. Aquino, RN. Mitambong usab sa maong kalihokan ang mga halangdun nga opisyal gikan sa Philippine National Police, Bureau of Fire Protection, City Disaster Risk Reduction and Management Office, ug uban pang miyembro sa IMT.
Tumong sa IMT ang pagpalig-on sa koordinasyon tali sa mga ahensya nga mag-atiman sa seguridad, medical response, ug pagdumala sa mga emergency atol sa kapistahan. Kabahin niini ang pagpresentar sa Security Plan ug Medical Plan ngadto sa mga miyembro ug komite sa Executive Committee (EXECOM) aron masiguro ang kahapsay ug kaluwasan sa tibuok nga selebrasyon.
Gilauman nga ang maong mga plano makatabang sa epektibong pag-atubang sa mga posibleng insidente ug emerhensya samtang nagpadayon ang usa sa labing dagkong kasaulogan sa probinsya.
Sumala sa mga organizer, ang pagtukod sa IMT nagpakita sa lig-on nga panaghiusa ug koordinasyon sa tanang hingtungdan nga ahensya aron masiguro ang malinawon, luwas, ug hapsay nga pagsaulog sa ika-27 nga T’nalak Festival ug ika-60 nga Foundation Anniversary sa South Cotabato alang sa mga residente ug mga bisita.