Nagmalampuson ang pag-host sa City Government of Valencia sa Bukidnon Economic Development and Investment Promotion Officers League (BEDIPOL) 2nd Quarter Meeting nga gipahigayon niadtong Hulyo 3, 2026, nga nagtigom sa mga Local Economic Development and Investment Promotion Officers (LEDIPOs) gikan sa nagkadaiyang lokal nga panggamhanan sa probinsiya aron hisgutan ang mga programa ug estratehiya alang sa pagpalambo sa lokal nga ekonomiya ug pagpasiugda sa mga oportunidad sa pamuhunan.
Gipangunahan ang maong kalihokan pinaagi sa suporta ni Mayor Amie Galario, uban ni Vice Mayor Greizl Galario-Fernandez ug sa 10th Sangguniang Panlungsod, ingon man ni City Government Spokesperson ug Consultant Jun Galario, nga nagpadayon sa pagpalig-on sa mga inisyatibo alang sa kalamboan sa dakbayan.
Dako usab ang suporta nga gipakita ni Hollander Hora, Head sa Local Economic Development and Investment Promotions Office (LEDIPO) Valencia, sa malampusong pag-organisa ug pagdumala sa maong panagtigom, nga nagpalig-on sa panaghiusa ug kolaborasyon sa mga LEDIPO sa tibuok Bukidnon aron mapalambo ang mga programa sa pagpamuhunan ug pagpalambo sa ekonomiya.
Gawas sa regular nga agenda sa liga, gihisgutan usab ang pangandoy sa Valencia City nga mahimong Highly Urbanized City (HUC), diin gipaambit ang mga benepisyo, oportunidad, ug mga konsiderasyon nga kauban sa maong tinguha. Ang maong diskusyon nakatampo sa pagpalawom sa pagsabot sa mga partisipante sa posibleng epekto niini sa pagdumala, pagpalambo sa ekonomiya, ug paghatag og serbisyo sa katawhan.
Photos: LEDIPO Valencia