Padayon nga gipakita sa Lokal nga Kagamhanan sa Dakbayan sa Valencia, ubos sa liderato ni Mayor Amie G. Galario, kauban ang 10th Sangguniang Panlungsod sa pagpanguna ni Vice Mayor Greizl Galario-Fernandez, ang pag-atiman ug pagtagad sa kaayohan sa mga senior citizen pinaagi sa paghatag sa ilang quarterly financial assistance.
Niadtong Hulyo 2, 2026, malampusong nakadawat ang 750 ka mga senior citizen sa Barangay Laligan sa ilang ₱600 nga pinansyal nga ayuda ubos sa 2nd Quarter Financial Assistance Program. Ang maong pagpanghatag gipatuman pinaagi sa iskedyul kada barangay aron masiguro ang hapsay, luwas, ug organisadong paghatod sa serbisyo ngadto sa mga benepisyaryo.
Gitambongan ang maong payout ni Mayor Amie Galario uban si Spokesperson and Consultant Jun Galario isip kabahin sa padayon nga pagmonitor ug pagsiguro nga hapsay nga maabot sa mga benepisyaryo ang mga programa ug serbisyo sa kagamhanan. Mas nahimong organisado ug malampuson ang kalihokan tungod sa hugot nga suporta ug presensya sa mga opisyal sa Barangay Laligan.
Ang maong inisyatiba kabahin sa padayon nga paningkamot sa administrasyong Galario sa paghatag og inklusibo, responsive, ug makatawhanong serbisyo publiko, ilabina alang sa mga sektor nga nanginahanglan og dugang nga suporta ug pag-atiman gikan sa kagamhanan.
PIAD | Jay Fernandez-Ara
Photos | Paul Pasilan & Den Batis