Patay ang duha ka pulis human nga gi-ambush sa wala pa mailhing mga suspek sa Barangay Tinumiguis, Lambayong, Sultan Kudarat niadtong gabii sa Martes, Hulyo 7, 2026.
Gi-ila ang mga biktima nga sila Patrolman Apollo M Pagurayan ug Patrolman Joerel Bullos, mga sakop sa 1202nd Maneuver Company sa Regional Mobile Force Battalion 12 (RMFB 12).
Matod pa nga samtang nagbiyahe sakay sa usa ka motorsiklo aron tumanon ang ilang katungdanan, kalit lang kining giatake sa wala pa mailhing mga armadong tawo ug gipamusil nga ma’oy rason sa ilang hinanaling kamatayon.
Sa matag higayon nga adunay pulis nga makutlo ang kinabuhi tungod sa serbisyo, dili lamang usa ka miyembro sa organisasyon ang mawala. Usa ka anak, usa ka igsoon, usa ka bana, usa ka amahan, ug usa ka higala ang dili na makapauli sa ilang panimalay.
Sa luyo sa uniporme adunay pamilya nga naghulat, nag-ampo, ug naglaom nga makabalik silang luwas human sa matag adlaw nga katungdanan.
Nagpadayon karon ang hot pursuit operation ug lawom nga imbestigasyon aron mailhan ang mga responsable sa madugong pagpamusil sa duha ka pulis nga wala’y lain nga tumong kundili ang kalinaw sa komunidad nga ilang gi-alagaran.
Ang maong hitabo nagpahinumdom sa tanan sa mga risgo nga adlaw-adlaw giatubang sa mga kalalakin-an ug kababayen-an sa kapulisan aron mapanalipdan ang kalinaw ug kaluwasan sa komunidad.
Sa niini nga masulob-on nga higayon, ang atong mga pag-ampo ipaabot nato ngadto sa mga nabilin nga pamilya nga hangtod karun gapangita ug hustisya sa pagkamatay sa ilang gimahal sa kinabuhi.
Hinaut nga ang sakripisyo nila Patrolman Pagurayan ug Patrolman Bullos, dili makalimtan ug mahimong inspirasyon sa padayon nga pagpaningkamot alang sa hustisya, kalinaw, ug kaluwasan sa matag Pilipino.
Pahulay sa kalinaw, mga bayani. Ang inyong dedikasyon ug pag-alagad sa nasud magpabiling buhi sa handumanan sa katawhan.