Malampusong giablihan sa Lokal nga Pangagamhanan sa Dakbayan sa Valencia ang Pulangi River Gakit Festival 2026 pinaagi sa usa ka ribbon-cutting ceremony nga gipahigayon sa Pulangi Riverside, Valencia City, Bukidnon, nga nagtimaan sa opisyal nga pagsugod sa usa sa labing gipaabot nga kasaulogan sa dakbayan nga nagpasidungog sa adunahang kasaysayan, kultura, ug panaghiusa sa mga Valenciano.
Gipangunahan ang maong seremonya ni Mayor Amie G. Galario, uban sa mga miyembro sa 10th Sangguniang Panlungsod nga gipangulohan ni Vice Mayor Greizl Galario-Fernandez.
Mitambong usab sa maong kalihokan si Valencia City Bukidnon Historical and Cultural Society President Antonio Alkuino, IP Mandatory Representative Bae Irene Pandian, Provincial Tourism Officer Butch Anthony Melendez, ug uban pang mga opisyal gikan sa nagkalain-laing ahensya ug sektor nga nagpakita sa ilang suporta sa maong kasaulogan.
Gihatagan og dugang nga kahayag ang opisyal nga pagbukas pinaagi sa maanindot nga opening salvo sa Valencia National High School, diin gipakita sa mga estudyante ang ilang talento pinaagi sa usa ka pasundayag nga naghulagway sa kultura, tradisyon, ug pagkailhan sa Dakbayan sa Valencia.
Misunod niini ang Gakit Parade, diin misalmot ang nagkalain-laing contingents nga nagpasundayag sa ilang mamugnaong gidayandayan nga mga gakit ug sa ilang paghiusa isip kabahin sa selebrasyon.
Sa Category A (Government Offices, Agencies and Institutions), nag-apil ang LGU Valencia, Barangay Community Leaders Association (BCLA), National Irrigation Administration (NIA)–Bukidnon Irrigation Management Office, ug Valencia City Water District (VCWD).
Samtang sa Category B (Clans, Families and Civil Society Organizations), misalmot ang SUMIFRU, Leyla Clan, Catarata Clan, ug Tamay Lang, nga matag usa nagpakita sa ilang pagkamamugnaon ug aktibong suporta sa maong kasaulogan.
Gipadayag usab sa Lokal nga Pangagamhanan ang dakong pagpasalamat sa tanang ahensya, organisasyon, ug mga boluntaryo nga mitampo aron maseguro ang hapsay, malinawon, ug malampusong pagpatuman sa unang adlaw sa Pulangi River Gakit Festival 2026.
Lakip sa gipasalamatan ang Philippine National Police (PNP), Bureau of Fire Protection (BFP), Philippine Army, Philippine Coast Guard, City Disaster Risk Reduction and Management Office (CDRRMO) Rescuers, BCLA Crime Watch, City Health Office (CHO), City Events Committee, Committee on Tourism, Arts & Culture Office ni Councilor Cecile Mabao-Caballero, communicators group, ug ang mga BDRRMO.
Pinaagi sa lig-on nga panaghiusa sa Lokal nga Pangagamhanan ubos sa liderato ni Mayor Amie Galario, kauban ang 10th Sangguniang Panlungsod sa pagpanguna ni Vice Mayor Greizl Galario-Fernandez, ug sa kooperasyon sa tanang partner agencies, stakeholders, ug mga partisipante, nagmalampuson ang opisyal nga pagbukas sa Pulangi River Gakit Festival 2026—usa ka kasaulogan nga nagpalig-on sa pagpreserbar sa kasaysayan, kultura, ug identidad sa Dakbayan sa Valencia samtang nagdasig sa panaghiusa ug partisipasyon sa tibuok komunidad.