Gipahigayon sa City Government of Valencia ang seremonyal nga pag-blessing sa lugar nga pagatukoran sa bag-ong Valencia City Hall sa Diversion Road, Barangay Bagontaas, Valencia City, Bukidnon niadtong Hulyo 16, 2026, nga nagsilbing unang lakang sa pagpatuman sa proyekto alang sa puhon bag-ong sentro nga pasilidad sa pagdumala sa Dakbayan sa Valencia.
Gipangulohan ni City Mayor Amie Galario ang seremonyas uban ni City Vice Mayor Greizl Galario-Fernandez, City Spokesperson ug kanhi City Mayor Jun Galario, mga miyembro sa ika-10 nga Sangguniang Panlungsod, mga opisyal sa lokal nga panggamhanan, ug mga empleyado sa City Government of Valencia.
Sa iyang mensahe, gipasiugda ni Mayor Galario nga ang puhon bag-ong City Hall simbolo sa panaghiusa, pagpaningkamot, ug sa padayon nga tinguha sa administrasyon nga mapalambo ang paghatag og serbisyo sa katawhan.
“Karong adlawa, atong gisaulog ang unang lakang padulong sa usa ka mas maayong kaugmaon alang sa atong LGU. Hinaut nga kining lugar mahimong sentro sa mas episyente ug responsive nga serbisyo publiko alang sa umaabot nga mga katuigan,” matud ni Mayor Amie. Midugang usab siya nga bisan daghan pa ang proseso ug trabaho nga pagahimuon, kini nga proyekto maghatag og dakong kaayohan sa umaabot nga mga henerasyon.
Samtang, gipahayag ni Vice Mayor Greizl Galario-Fernandez nga ang ceremonial blessing usa ka pagpahinungod sa usa ka panan-awon alang sa matag Valenciano. Matud niya, sa dili pa magsugod ang pagtukod sa proyekto, una nilang gipangayo ang panalangin sa Ginoo aron ang bag-ong City Hall mahimong simbolo sa usa ka panggamhanan nga nag-una sa serbisyo, integridad, transparency, ug kaayohan sa katawhan.
Sa iyang bahin, gipahayag ni Konsehal Annalou Zambrano nga ang pagtuman sa maong panan-awon maghatag og usa ka malungtarong simbolo sa panaghiusa ug kalamboan alang sa tanang Valenciano.
Gipahibalo usab ni City Spokesperson ug kanhi City Mayor Jun Galario nga nagpadayon ang mga proseso alang sa pagtukod sa bag-ong City Hall ug posible nga masugdan ang construction sa Oktubre o Nobyembre ning tuiga. Matud niya, ang gi-process nga loan alang sa proyekto niagi na sa Landbank ug sa Bureau of Local Government Finance, ug gipaabot na lamang ang pinal nga pag-apruba sa Monetary Board aron mapadayon ang implementasyon sa proyekto.
Ang pagtukod sa bag-ong City Hall gilauman nga mapondohan pinaagi sa ₱1 bilyon nga bahin sa kapin ₱2.7 bilyon nga loan nga gi-process sa Landbank alang sa nagkalain-laing priority infrastructure projects sa Dakbayan sa Valencia.
Gihatag usab ni Architect John Malaya sa City Engineer’s Office ang overview sa proyekto. Matud niya, ang bag-ong City Hall pagatukoron sa lima ka ektaryang yuta ug maglangkob sa siyam ka mga building, lakip ang executive, legislative, ug administrative buildings.
Gipasabot niya nga ang development gidisenyo aron mahiusa ang nagkalain-laing opisina sa lokal nga panggamhanan sa usa ka modernong administrative complex nga adunay office spaces, public service areas, executive offices, council ug conference halls, support facilities, ug civic spaces alang sa mga kalihokan sa komunidad.
Ang disenyo sa bag-ong City Hall nagsunod sa contemporary modern architecture ug sustainable, climate-responsive principles pinaagi sa paggamit sa natural nga kahayag ug hangin, energy-efficient systems, ug environmentally responsible building features. Gikonsiderar usab ang accessibility, kaluwasan, resilience, ug posibilidad sa umaabot nga pagpalapad sa pasilidad.
Labaw sa tanan, ang bag-ong City Hall gilauman nga mahimong usa ka civic landmark nga nagrepresentar sa transparency, maayong pangagamhanan, inobasyon, ug malungtarong panaghiusa sa mga Valenciano, isip sentro sa serbisyo publiko nga magsilbi sa daghang henerasyon. (PIAD)
Photos: Carl Tradz