Gidayig ug nagpasalamat si Police General Jose Melencio C. Nartatez Jr., Chief, Philippine National Police ngadto sa tanang kapulisan nga matinud-anong mituman sa ilang katungdanan pinaagi sa pagpakita og taas nga lebel sa propesyonalismo, disiplina, ug pagpugong sa kaugalingon atol sa malinawon nga pagdumala sa nahuman nga public assembly nga gipasiugdahan sa United People’s Initiative sa nagkadaiyang bahin sa nasud nga nahitabo kagahapon, Hulyo 19, 2026 atol sa gihimong Traditional Monay Flag Raising Ceremony karung buntag sa Lunes, Hulyo 20, 2026 sa Camp Crame, Quezon City.
Sa iyang mensahe, gipadayag ni CPNP Nartatez ang iyang dakong pagpasalamat ug pagdayig sa sakripisyo, pagpailob, ug dedikasyon sa matag pulis nga nagbarug aron mapanalipdan ang kalinaw ug kahapsay samtang gitahod ang katungod sa mga lumulupyo sa pagpahayag sa ilang mga tingog sa malinawon nga paagi. Matud pa niya, “I commend each one of you in carrying your duties with professionalism, discipline and restraint.”
Gipasabot usab sa PNP Chief nga ang maong kalampusan usa ka pamatuod sa lig-on nga panaghiusa ug pasalig sa kapulisan sa pag-alagad sa katawhan. Pinaagi sa ilang kalma, maampingon, ug responsable nga paglihok, napakita nila nga ang pagpatuman sa balaod mahimong mahiuyon sa pagrespeto sa dignidad ug mga katungod sa matag Pilipino.
Gipasalamatan ni CPNP Nartatez ang tanang personnel nga walay kakapoy nga nagserbisyo bisan pa sa mga hagit nga ilang giatubang. Iyang gipasidunggan ang ilang kaisog ug dedikasyon, ug giaghat sila nga ipadayon ang maayong ehemplo sa matinud-anon, disiplinado, ug makatawhanon nga pag-alagad alang sa kalinaw ug kaayohan sa nasud.