Malampusong gipahigayon sa Malaybalay City Agricultural and Fishery Council (CAFC) ang ilang General Assembly Meeting sa Farmers Training Center (FTC), City Agriculture Office, niadtong Hulyo 16, 2026.
Si Engr. Richard B. Leono, City Agriculturist ug CAFC Co-Chairperson mihatag og mubo nga pahibalo kabahin sa bag-ohay lang nga flash flood nga nahitabo sa siyudad. Samtang si Mr. Leonard O. Leyros, CAFC Chairperson, mihatag og mensahe sa suporta alang sa mga miyembro. Giaprobahan usab sa konseho ang agenda ug ang minutes sa miaging miting sa wala pa hisguti ang kahimtang sa pagpatuman sa mga naunang resolusyon ug mga kasabutan.
Atol sa miting, gipaambit ni Dr. Omar T. Cahanap sa City Veterinary Office ang positibong kalamboan sa sektor sa kahayupan. Iyang gipahibalo nga ang Malaybalay City nahimutang sa ikaduhang pwesto sa Northern Mindanao sa dairy category ug adunay dakong potensyal sa dairy stock farming.
Gipadayag usab niya ang plano sa pagpahigayon og Malaybalay City Dairy Forum o Dairy Summit ug ang pagkahimong unang LGU sa Northern Mindanao nga nakasumite og Letter of Intent ngadto sa National Dairy Authority (NDA), nga makabenepisyo sa 50 ka indibidwal nga dairy recipients.
Gipasiugda usab niya ang kabalaka sa ubos nga presyo sa buhing baboy ug mihangyo sa CAFC nga mopasar og resolusyon nga mosuporta sa patas nga farmgate price alang sa mga hog raisers.Gihatag ni Ms. Floredel Tinoy ang mga update gikan sa City Agriculture Office, gisundan sa paghisgot sa mga gisugyot nga resolusyon sa CAFC, mga rekomendasyon, ug umaabot nga mga kalihokan sa konseho.
Natapos ang General Assembly pinaagi sa pagpasalamat sa tanang miyembro alang sa ilang padayon nga partisipasyon ug dedikasyon sa pagpalambo sa sektor sa agrikultura ug pangisdaan sa Dakbayan sa Malaybalay.
Report: Trisha Margaret T. Bustos, City Agri-NADA