Nakadawat og tig-P60,000 nga labor cost subsidy ang 57 ka internally displaced persons (IDPs) sa Marawi City gikan sa Bangsamoro Government ubos sa Construction Materials Assistance Program.
Gipahigayon ang pag-apod-apod niadtong Hulyo 20 sa Marawi Rehabilitation Program Office sa Barangay Panggao Saduc aron makatabang sa gasto sa pagpapatukod pag-usab sa ilang mga balay.
Tungod niini, mikabat na sa 283 ka pamilya ang nakadawat sa maong tabang human makompleto ang pagtukod sa ilang mga balay sa mga lugar nga labing naapektuhan sa Marawi Siege niadtong 2017.
Sumala sa Marawi Rehabilitation Program, tumong sa subsidy nga mapagaan ang gasto sa mga benepisyaryo sa labor ug matabangan sila nga makapatukod og mas lig-on ug luwas nga mga panimalay.
Matud ni MRP Supervising Head Engr. Abdulhanif Ondi, padayon nilang gibisita ug gisusi ang mga balay sa mga benepisyaryo isip kabahin sa proseso sa pagpili sa sunod nga makadawat sa labor cost subsidy.
Nagpasalamat usab ang usa sa mga benepisyaryo sa Bangsamoro Government tungod sa dakong tabang sa programa aron makabalik sila sa ilang mga panimalay nga nadaot panahon sa panagbangi.
Samtang, midawat usab ang Marawi Rehabilitation Program og mga aplikasyon alang sa Provision of Educational Cash Assistance (PECA) para sa mga estudyante gikan Kindergarten hangtod Grade 6. Ang mga aplikasyon ipailalom sa screening ug beripikasyon una kini maaprobahan.
Source: StarFM Cotabato