Sikop sa mga operatiba sa Malaybalay City Police Station ug Kalilangan Municipal Police Station ang usa ka 19-anyos nga lalaki nga giila nga suspek sa pagpatay sa usa ka miyembro sa LGBTQ+ ug misulay usab og dunggab sa usa sa mga pulis atol sa follow-up operation nga gihimo sa Sitio Sabang, Barangay Central Poblacion, Kalilangan, Bukidnon, alas-12:56 sa kaadlawon niadtong Agosto 6, 2026.
Nahibal-an nga gilunsad ang operasyon human makadawat og impormasyon gikan sa mga concerned citizens nga nagtago ang suspek sa maong lugar. Giila ang suspek isip person of interest sa pagpatay sa usa ka miyembro sa LGBTQ+ nga nailhan lamang sa alyas nga “Bety,” nga nakit-an nang patay sa Barangay 1, Malaybalay City niadtong Hulyo 27, 2026.
Nasayran nga samtang giduolan sa mga pulis ang suspek aron badlongon tungod sa paglapas sa curfew ordinance, kalit lang mikuha og hunting knife ug misulay og dunggab sa usa sa mga pulis. Nakalikay ang pulis ug, uban sa tabang sa ubang operatiba, dali nga nadakpan ang suspek.
Nagsugabang ang suspek og daghang kaso lakip na ang Murder, Direct Assault, ug Illegal Possession of Deadly Weapon.
Padayon ang PNP sa pagmintinar sa kalinaw sa probinsya sa Bukidnon inubanan sa mga lungsuranon aron makab-ot ang kalamboan.