Gipasiugda sa 6th Infantry “Kampilan” Division ug Joint Task Force Central nga nagpabilin silang propesyonal, walay pinili sa politika, ug matinumanon sa Konstitusyon samtang nagkaduol ang Bangsamoro Parliamentary Elections.
Matod ni Lt. Col. Ronald E. Suscano, tigpamaba sa 6th Infantry Division ug Joint Task Force Central, nga ubos sa pagpangulo ni Major General Jose Vladimir R. Cagara, ang ilang yunit nagpunting sa pagmintinar sa kalinaw ug kahapsay sa ilang area of responsibility.
Dungan niini, gihangyo sa militar ang publiko nga makigtambayayong sa pagmintinar sa malinawon nga eleksyon pinaagi sa paglikay sa kapintasan ug sa dayong pagreport sa bisan unsang kahina-hinalang kalihokan ngadto sa mga awtoridad.
Gipasiugda usab ni Suscano nga andam ang hotline sa ilang yunit aron dali nga makatubag sa bisan unsang tensiyon o insidente nga mahimong mahitabo sa mga komunidad.
Nanawagan ang 6th Infantry Division sa tanang sektor nga magtinabangay aron masiguro ang malinawon, luwas, ug hapsay nga Bangsamoro Parliamentary Elections.
Source: StarFM Cotabato