Mokabat sa 4,293 ka pobre ug near-poor nga mga benepisyaryo gikan sa 20 ka barangay sa lungsod sa Senator Ninoy Aquino ang nakadawat og ₱2,000 matag usa ubos sa Unified Package for Livelihoods, Industry, Food, and Transport (UPLIFT) Assistance Program sa Department of Social Welfare and Development (DSWD).
Ang mga benepisyaryo giila pinaagi sa Community-Based Monitoring System (CBMS), nga gigamit isip basehan sa pagtino sa mga kwalipikadong makadawat sa maong ayuda.
Gawas sa pag-apod-apod sa pinansyal nga tabang, gipaduol usab sa lokal nga panggamhanan sa Senator Ninoy Aquino ang nagkalain-laing serbisyo sa gobyerno ngadto sa mga residente. Lakip niini ang PhilHealth YAKAP registration ug National ID registration pinaagi sa Philippine Statistics Authority (PSA).
Gidasig usab ang mga benepisyaryo nga magparehistro sa G2P App isip pagpangandam alang sa sunod nga tranche sa ayuda ubos sa maong programa. Ang inisyatiba nagtumong sa paghatag og dugang nga suporta sa mga kabus ug hapit-kabus nga pamilya aron matabangan sila sa ilang panginahanglanon ug panginabuhian.