Narekober sa Police Regional Office 10 (PRO10) ang 1,592 reams o 43 master cases sa gituohang peke nga sigarilyo nga gibanabana og ₱1.472 milyon sa managlahing insidente sa Iligan City ug Misamis Oriental niadtong Agosto 15 ug 16, 2026.
Sa Iligan City, nakumpiska sa mga personnel sa City Intelligence Unit–City Special Operations Unit sa Iligan City Police Office ang 12 master cases o 600 reams sa “Canon” cigarettes nga nagkantidad og kapin ₱480,000.00 atol sa anti-smuggling operation sa Barangay Tubod.
Duha ka mga indibidwal nga sakay sa Isuzu Travis ang gi-intercept human mapakyas sa pagpresentar og mga dokumento sa legal nga pag-import, Bureau of Customs clearance, tax stamps ug pruweba sa pagbayad sa hustong buhis.
Samtang sa Lugait, Misamis Oriental, 31 master cases sa “Red Modern” cigarettes nga nagkantidad og ₱992,000 ang narekober sulod sa usa ka Toyota Hi-Ace van nga nalambigit sa vehicular accident sa National Highway sa Barangay Poblacion.
Base sa mga saksi, gikan sa Iligan City paingon sa Cagayan de Oro City ang van sa dihang mibuto ang atubangang tuo nga ligid, hinungdan nga nawad-an og kontrol ang drayber ug natumba ang sakyanan. Mikagiw ang drayber ug pasahero ug gibiyaan ang van.
Nadiskubrehan usab sa kapulisan ang mga iregularidad sa registration documents sa sakyanan, lakip ang expired nga Official Receipt ug plate number nga dili motakdo sa sakyanang gigamit.
“Our personnel remain vigilant in every police response because illegal activities can surface in unexpected circumstances. These incidents underscore the value of alertness, proper verification, and coordinated police action in intercepting suspected smuggled goods and ensuring that appropriate procedures are observed. PRO10 will continue to strengthen its efforts against smuggling in close coordination with our partner agencies,” sigun ni Police Brigadier General Christopher N Abrahano, Amahan sa PRO 10.