Patay sa usa ka engkuwentro ang usa ka giisip nga most wanted person ug giingong leader sa Masaronay Group human misukol sa mga operatiba sa kapulisan nga mo silbi sa Warrant of Arrest sa Barangay Mindalano, Salvador, Lanao del Norte niadtong Agosto 17, 2026.
Giila ang namatay nga si alyas “Talib” Masaronay, nga giingong lider sa Masaronay Group nga nalambigit sa nagkalain-laing krimen sa Northern Mindanao ug mga kasikbit nga rehiyon.
Nakalista usab kini nga Number 7 Most Wanted Person ug nagsagubang sa pito ka ihap sa Murder ug Frustrated Murder
Base sa police intelligence, sukad pa niadtong 2016 giingong nalambigit na si alyas Talib sa pipila ka ilegal nga kalihokan, lakip ang illegal drug trade, gun-for-hire activities, ug giingong paghatag og pinansyal nga suporta sa mga personalidad nga may kalabotan sa Daulah Islamiyah-Maute Group.
Nakuha gikan sa lugar ang usa ka M16 rifle, .45 caliber pistol, mga magazine ug bala, lakip ang walo ka sachet sa gituohang shabu nga adunay kinatibuk-ang gibug-aton nga mga 150 gramos ug gibanabana nga nagkantidad og ₱1.02 milyon.
Padayon usab nga giawhag sa PNP ang publiko nga makigtambayayong ug maghatag og impormasyon sa mga awtoridad bahin sa mga indibidwal nga nalambigit sa armadong kriminalidad ug uban pang ilegal nga kalihokan.