Nasakmit sa mga awtoridad ang gibanabanang ₱2.1milyon nga kantidad sa gidudahang mineral ores ug ang wing van nga gigamit atol sa usa checkpoint operation sa Purok 1, Butadon, Kapatagan, Lanao del Norte takna 6:10 sa gabii niadtong Agosto 24, 2026.
Giila ang tulo ka nasikop nga suspek nga sila alyas “Ewing,” 41 anyos, driver; alyas “Onil,” 20 anyos; ug alyas “Ken,” truckman, tanan residente sa Zamboanga Sibugay ug nag-atubang sa kaso tungod sa paglapas sa Republic Act No. 7942 o ang Philippine Mining Act of 1995.
Nasayran nga walay legal nga mga dokumento nga napakita ang mga suspek alang sa pag-transport sa ilang gidala nga gidudahang mineral ores. Namatikdan usab ang paggamit sa usa ka dili awtorisadong improvised plate number.
Sa pagberipikar sa awtoridad, nadiskobrehan nga expired na ang Official Receipt (OR) sa maong sakyanan, nga usa usab ka paglapas sa Republic Act No. 4136 o Land Transportation and Traffic Code.
Narekober sa maong operasyon ang gibana-banang 420 ka sako sa gidudahang mineral ores nga adunay kinatibuk-ang gibug-aton nga 25 metric tons ug gibanabana nga nagkantidad og Php2.1 milyon.
“This operation demonstrates our continued commitment to stopping the unauthorized transport of mineral resources and ensuring that violations of the law are properly addressed,” matod pa ni PBGen Aaron M Mandia, Officer-In-Charge sa Police Regional Office 10.