Gitugyan sa pito ka kani rebelde ang napulog-usa ka high-powered firearms sa mga awtoridad sa Bukidnon sa communist armed movement isip kabahin sa ilang desisyon nga biyaan ang armadong pakigbisog ug mobalik sa malinawon nga pagpuyo sa Camp Captain Ramon M. Onahon sa Malaybalay City niadtong Agosto 27, 2026.
Nahibal-an nga gipangulohan ni Police Lieutenant Colonel Alfredo G. Ortiz Jr., Deputy Provincial Director for Operations, ubos sa pagdumala ni Police Colonel Oliver S. Navales, Provincial Director sa Bukidnon Police Provincial Office ang maong aktibidad.
Sumala sa mga awtoridad, boluntaryong gitugyan sa pito ka kanhing rebelde, nga gitawag og Friends Rescued (FRs), ang ilang mga armas human sila mipili nga mobalik sa normal nga pagkinabuhi isip mga sibilyan.
Ang pagsurender gihimo ubos sa Task Force Balik-Loob Program ug Enhanced Comprehensive Local Integration Program (E-CLIP), nga nagtumong sa pagtabang sa mga kanhing miyembro sa armadong grupo nga makabalik sa ilang pamilya ug komunidad.
Gawas sa pagkunhod sa gidaghanon sa mga armas nga posibleng magamit sa pagpanlupig, gipakita usab sa maong insidente ang kahinungdanon sa mga programa nga naghatag og higayon alang sa kalinaw, reintegrasyon, ug bag-ong kinabuhi.
Mitambong usab sa seremonya ang mga representante sa DILG ug Philippine Army, isip pagpamatuod sa padayon nga panagtinabangay sa nagkalain-laing ahensya alang sa kalinaw ug seguridad.
Alang sa pito ka kanhing rebelde, ang pagtugyan sa ilang mga armas usa ka importante nga lakang aron hingpit nang biyaan ang armadong pakigbisog ug magsugod pag-usab sa legal ug malinawon nga pagkinabuhi.