Ang 1st Regional Inter-Tribal Convention nahimong makasaysayanong higayon alang sa unom ka Non-Moro Indigenous Peoples (NMIP) nga komunidad sa BARMM—Teduray, Lambangian, Dulangan Manobo, Erumanen ne Menuvu, Higaonon, ug Blaan—nga nagtigom aron palig-onon ang ilang panaghiusa ug mahibal-an ang hiniusang direksyon alang sa representasyon sa mga lumad niadtong Agosto 25, 2026 sa Pagana Grand Ballroom, Cotabato City.
Gisugdan ang panagtigom pinaagi sa usa ka ritwal sa Teduray, gisundan sa pormal nga pagsulod sa mga delegado, nominado, ug mga observer. Sa 60 ka delegado, 58 ang mitambong, busa natukod ang quorum ug nakapadayon ang convention sa makahuluganon nga diskusyon, deliberasyon, ug hiniusang pagdesisyon.
Sentro sa convention ang paghisgot sa Term Rotation Arrangement alang sa duha ka NMIP representative seats. Ang matag tribo gihatagan og higayon nga mosulti, maminaw, mopahayag sa ilang mga kabalaka, ipresentar ang ilang posisyon, ug mangita og komon nga panag-uyon.
Pinaagi sa dayalogo, konsultasyon, kompromiso, ug consensus-building, ang unom ka tribo nakab-ot ang hiniusang kasabutan nga ang duha ka mga lingkuranan sa NMIP representative magpuli-puli og termino tali kanila. Ang Teduray ug Lambangian ang moserbisyo sa unang termino, sundan sa Erumanen ne Menuvu ug Dulangan Manobo, ug dayon Blaan ug Higaonon. Pinaagi niini, matag tribo makabaton og higayon nga mahimong representante.
Human niini, gipresentar ang mga napiling NMIP representatives. Sila mao sila Leticio L. Datuwata gikan sa Lambangian Tribe ug Jo Genna Martin Jover gikan sa Teduray Tribe. Pareho silang nagpahayag sa ilang pasalig nga dad-on dili lamang ang mga kabalaka sa ilang tagsa-tagsa ka tribo, kondili usab ang hiniusang pangandoy sa mas lapad nga NMIP community.
Gipahigayon usab ang usa ka panel interview diin gisusi ang ilang mga baruganan bahin sa konsultasyon ug transparency, ancestral domain ug land rights, pagpalig-on sa Indigenous Political Structures, ug koordinasyon sa MIPA ug uban pang ahensya sa gobyerno.
Nasaksihan ang maong kalihokan sa mga opisyal sa COMELEC, lakip si Chairman Atty. George Garcia, Regional Director Ray Sumalipao, ug Commissioner Pipo, uban ni MIPA Minister Guiamal B. Abdulrahman, mga representante sa MIPA, ug uban pang mga observer.
Dili lamang usa ka ordinaryong panagtigom ang 1st Regional Inter-Tribal Convention. Gipakita niini ang gahum sa consensus-building sa paghiusa sa nagkalain-laing komunidad aron makab-ot ang usa ka hiniusang desisyon.
Pinaagi sa ilang naandan nga mga proseso, bukas nga dayalogo, ug pagrespeto sa usag usa, ang mga kalainan nahimong oportunidad alang sa mas lawom nga pagsinabtanay ug kooperasyon.
Gitapos ang convention pinaagi sa simbolikong paghatag sa mga tribo og mga token ngadto sa mga napiling representante, uban sa usa ka ritwal nga gipangulohan sa Teduray alang kanila—nga nagpasabot sa pagsalig ug responsibilidad nga gihatag ngadto kanila.
Unom ka tribo ang nagkahiusa bisan lahi-lahi ang ilang mga panan-aw ug pangandoy. Apan pinaagi sa consensus, nakapadayon sila isip usa ka komunidad nga adunay usa ka hiniusang tingog.