Dili lamang usa ka selebrasyon, kundili usa usab ka panawagan alang sa mas lig-on ug matinud-anong serbisyo publiko ang paglunsad sa 126th Philippine Civil Service Anniversary karong adlawa, Septyembre 7, 2026, sa City Hall Atrium, diin gihatagan og dakong pagtagad ang panaghiusa ug responsibilidad sa mga kawani sa LGU-Tagum.
Gipasiugda ni Director Ruby A. Española, Director II sa Civil Service Commission Field Office Davao del Norte, nga ang tinuod nga pagserbisyo sa katawhan dili lamang kutob sa mga pulong o saad, kundili kinahanglan makita ug mabuhi sa matag lihok ug buhat sa usa ka lingkod-bayani.
Pinaagi sa iyang mensahe nga, “May our commitment today be our action tomorrow,” iyang gipahinumdoman ang mga kawani nga ang tinuod nga dedikasyon sa serbisyo kinahanglan makita sa ilang mga buhat ug dili lamang kutob sa mga pulong.
Kabahin usab sa kalihokan ang Lingkod Bayani Commitment Wall, diin mipirma si City Administrator Mr. Edgar de Guzman, kauban ang mga miyembro sa 10th Sangguniang Panlungsod ubos sa pagpanguna ni Vice Mayor Atty. Eva Lorraine Estabillo, ug ang mga department heads sa lokal nga panggamhanan. Kini nagsimbolo sa ilang hiniusang paningkamot ug pasalig sa matinud-anon, responsable, ug dekalidad nga pagserbisyo sa katawhan.
Atol sa paglunsad, gipresentar usab ang mga kalihokan nga ipahigayon karong Septyembre isip kabahin sa selebrasyon sa 126th Philippine Civil Service Anniversary. Gipaila usab ang unom ka clusters nga nagrepresentar sa nagkalain-laing opisina ug departments sa LGU-Tagum – Executors, Developers, Fiscalizers, Providers, Cultivators, ug Legislators diin ang matag cluster makigkompetensya sa nagkalain-laing competitions ug activities nga gitakda karong bulana, isip kabahin sa selebrasyon ug pagpalig-on sa teamwork ug camaraderie taliwala sa mga kawani.