Malipayong midawat ang mga estudyante sa Pandapan Integrated School ug Magdum National High School sa school kits ug financial assistance nga gipangapod-apod kagahapong adlawa, Septyembre 7, 2026, ubos sa Sulong-Dunong Program nga gipangulohan sa Project CO – Programang Pang-Edukasyon.
Sa maong kalihokan, 105 ka benepisyaryo gikan sa Pandapan Integrated School ug 35 ka benepisyaryo gikan sa Magdum National High School ang nakadawat og suporta. Lakip niini ang school kits ug financial assistance alang sa ilang uniform ug PTA fees, nga makatabang sa pagpagaan sa ilang mga gastusin sa pag-eskwela.
Kabahin kini sa padayon nga suporta sa Lokal nga Panggamhanan sa Tagum, sa pagdumala ni Mayor Rey T. Uy, nga nagpalig-on sa suporta sa sektor sa edukasyon aron matabangan ang mga kabatan-onan sa pagpadayon sa ilang pagtuon ug pag-abot sa ilang mga pangandoy sa kinabuhi.