Gipusil ug namatay ang usa ka 30-anyos nga lalaki sa wala pa mailhing suspek sa Sitio Manampan, Barangay Batulawan, Malidegao, Special Geographic Area o SGA, BARMM kagahapon sa gabii, Setyembre 10.
Giila ang biktima nga si Ralphzan Tayuan Pilas, residente sa Poblacion, Datu Piang, Maguindanao del Sur, nga nakaangkon og daghang samad sa bala sa ulo, likod ug abaga.
Gidala dayon ang biktima sa Cruzado Medical Hospital apan gideklarar nga dead on arrival sa attending physician.
Narekober sa crime scene ang duha ka slug ug unom ka fired cartridge cases nga gituohang gikan sa .45-caliber nga armas.
Naglunsad og hot pursuit operation ang Malidegao MPS uban sa 1405th MFC, RMFB 14-A ug 42nd SAC sa PNP-SAF. Nakigkoordinar usab ang mga awtoridad sa mga kasikbit nga pwersa alang sa posibleng pagkadakop sa suspek.
Samtang, gilayon nga gikuha sa pamilya ang lawas sa biktima subay sa Islamikong kostumbre ug tradisyon.
Padayon ang imbestigasyon aron matino ang motibo sa pagpamusil ug mailhan ang responsable sa insidente alang sa tukmang legal nga aksyon.
Source: StarFM Cotabato