Nasamdan ang usa ka 41-anyos nga driver human gipusil sa wala pa mailhing suspek ang truck nga iyang gimaneho sa Picong, Lanao del Sur kagahapon sa gabii, Setyembre 9.
Giila sa Picong Municipal Police Station ang biktima nga si alyas Jun, residente sa Barangay Kalubi, Sultan Naga Dimaporo, Lanao del Norte.
Base sa imbestigasyon sa kapulisan, padulong unta sa Cotabato City ang biktima sakay sa yellow nga forward truck nga adunay plaka nga NBD 3896 ug kargado og gibanabanang 750 ka sako sa semento.
Pag-abot sa Sitio Hilltop, Barangay Maganding, samtang nagbiyahe sa Narciso Ramos Highway, kalit nga gipusil sa suspek ang truck gamit ang wala pa mailhing armas.
Naigo ang biktima sa ubos nga bahin sa iyang tuo nga bitiis ug daling gidala sa Dr. Seraphio Montañer Memorial Hospital alang sa medikal nga pagtambal.
Samtang, dali nga mikalagiw ang suspek ug wala pa matino ang direksyong iyang giadtoan.
Padayon ang imbestigasyon sa kapulisan aron mailhan ang suspek ug mahibal-an ang motibo sa pagpamusil. Nagpatuman usab og hot pursuit ug manhunt operation ang Picong MPS, 3rd MP RMFC 1403rd RMFB14-A Platoon, ug 64th Infantry Battalion sa Philippine Army.
Source: StarFM Cotabato