Gipasidan-an sa Provincial Disaster Risk Reduction and Management Office (PDRRMO) ang katawhan sa Bukidnon kalabot sa posibleng masinati nga lima ka bulan nga kakulang sa ulan gikan sa Oktubre 2026 hangtod Pebrero 2027 tungod sa hulga sa El Niño phenomenon.
Base sa pinakabag-ong outlook sa PAGASA, ang Bukidnon lakip sa mga probinsya sa Mindanao nga makasinati og grabeng kakulang sa ulan o lima ka sunod-sunod nga bulan nga below-normal nga precipitation nga anaa sa 21% hangtod 60% nga pag-ubos sa normal niini.
Agig pagpangandam, nagpatawag og Response Cluster Emergency Meeting ang LGU Bukidnon ug PDRRMO, aron i-plastar ang Strategic Action Plan.
Gitambagan ni DRRMO IV Israel Johan Damasco Jr. ang publiko, ilabina ang mga mag-uuma ug mga vulnerable sectors, nga kanunay maminaw sa mga opisyal nga advisory gikan sa PDRRMO ug sa Provincial o Municipal Agriculture Office aron masayran ang saktong giya sa pagtanom ug uban pang angay nga lakang sa kaluwasan.