Sikop ang usa ka 34-anyos nga lalaki nga giila sa alyas “Ramon” human misulay og tigbas sa usa ka opisyal sa kapulisan gamit ang sundang sa Barangay Kisolon, Sumilao, Bukidnon, kagahapong adlawa.
Base sa report, nanghasi ang suspek duol sa Sumilao Municipal Police Station pinaagi sa paglabay og bato ug pagsinggit samtang nagbitbit og sundang.
Girespondehan dayon sa mga personnel sa Sumilao MPS nga gipangulohan ni PCPT Arlie S. Cardinal, OIC, ang maong insidente.
Sa dihang giduolan ug gipahunong ang suspek, kalit kining misulong ug misulay pagtigbas kang Cardinal.
Nasagang sa opisyal ang pag-atake, hinungdan nga nadakop ug napasurender ang suspek.
Gikustodiya na sa kapulisan ang suspek ug giandam ang kaso batok kaniya tungod sa Direct Assault Against an Agent of a Person in Authority.
Source: Bombo Radyo Bukidnon