Naghimo og send-off ceremony ang Coast Guard District Southwestern Mindanao o CGDSWM alang sa mga personnel ug BRP Tubbataha nga gipadala isip suporta sa 2026 Bangsamoro Parliamentary Elections.
Gipahigayon ang seremonya sa Ben Go Wharf sa Zamboanga City kagahapon, Setyembre 10.
Gipangulohan ni Acting Deputy Commander Capt. Angela C. Tobias ang seremonya, diin iyang gipadayag ang mensahe ni CGDSWM Commander Commodore Rejard V. Marfe bahin sa katungdanan sa mga personnel sa pagsiguro sa seguridad sa mga komunidad ug mga ruta sa dagat.
Gipasiugda usab sa deployment ang pagpadayon sa pagka-non-partisan sa mga personnel ug ang pagsunod sa Konstitusyon ug mga balaod sa pagtuman sa ilang election security duties.
Lakip sa gipadala ang BRP Tubbataha o MRRV 4401, samtang mitambong usab sa seremonya ang mga opisyal sa ubang Coast Guard vessels ug support units ubos sa CGDSWM.
Tumong sa deployment nga makatabang sa pagmintinar sa luwas ug hapsay nga maritime environment samtang ipahigayon ang unang Bangsamoro Parliamentary Elections sa Setyembre 14.
Source: StarFM Cotabato