Kapin ₱478,000 nga balor sa gitoohang shabu ang nasakmit samtang duha ka suspetsado sa ilegal nga drugas ang nadakpan sa managlahing buy-bust operations nga gipahigayon sa kwerpo sa kapolisan sa lungsod sa Kalilangan ug Malitbog, Bukidnon.
Sa taho nga nadawat sa Bombo Radyo gikan sa Bukidnon Police Provincial Office sa pamunoan ni Provincial Director PCOL Oliver Sotto Navales, unang nadakpan sa Purok 6, Central Poblacion, Kalilangan si alyas “Berto”, 29-anyos ug giisip nga Street Level Individual (SLI). Nakuha gikan kaniya ang upat ka sachet sa shabu nga motimbang og 70.13 ka gramo ug nagkantidad og ₱476,884, lakip ang usa ka motorsiklo, cellphone, ug backpack.
Samtang sa gipahigayon nga operasyon sa Zone 1, Barangay Poblacion, lungsod sa Malitbog, nadakpan usab ang usa ka 36-anyos nga lalaking SLI human nakuhaan og tulo ka sachet sa gitoohang shabu nga nagbalor og ₱1,672.80.
Sa kasamtangan, ang mga nadakpang suspetsado gipangbalhug na sa selda sa matag stasyon sa kapolisan samtang ginaandam na ang pormal nga kaso batok kanila kalabot sa paglapas sa Republic Act 9165, ug ang mga nakumpiskang drugas gidala na sa Forensic Unit alang sa pagsusi.