Aktibong miapil ang Malaybalay City Health Office (CHO) sa Primary Eye Care Training, usa ka capacity-building activity nga nagtumong sa pagpalig-on sa paghatag og accessible ug kalidad nga eye care services sa komunidad.
Gipangunahan sa Provincial Health Office (PHO) ubos sa pagpangulo ni Dr. Raima Marijan L. Sucor, sa pakigtambayayong sa Department of Health (DOH) Region X–Noncommunicable Diseases (NCD) Cluster, ang maong training alang sa mga health personnel.
Pinaagi sa mga lecture, diskusyon, demonstrations ug pagpaambit sa kasinatian, gipalapdan ang kahibalo ug kahanas sa mga partisipante sa early detection, hustong pagdumala, referral ug prevention sa malikayang pagkadaot sa panan-aw.
Gipasiugda usab sa training ang importansya sa pag-apil sa eye health isip kabahin sa primary health care, tungod sa dakong papel sa maayong panan-aw sa kahimsog, kaluwasan, edukasyon, trabaho ug kalidad sa kinabuhi.
Gipasalamatan sa CHO ang PHO ubos sa pagpangulo ni Dr. Sucor ug ang DOH Region X–NCD Cluster sa ilang technical guidance ug pagpaambit sa kahibalo aron mapalambo ang eye health services sa Northern Mindanao.
Ang mga nakat-unan sa training gamiton sa CHO sa pagpalig-on sa primary eye care services ug pagseguro nga ang mga residente makadawat og tukma sa panahon nga eye care, assessment ug referral kung gikinahanglan.
Ni: Mhegan L. Dominguez, CHO-NADA