Malampusong gipahigayon ang unang adlaw sa Digital Skills Festival niadtong Setyembre 26, 2026 nga ikaduhang tuig na nga gihimo isip kabahin sa padayong paningkamot sa Kagamhanang Lokal sa Valencia City, Bukidnon sa pagpalambo sa kahibalo ug digital skills sa mga lumulupyo.
Pinaagi sa maong kalihokan, gihatagan og higayon ang mga partisipante nga makakat-on ug makapalambo sa ilang kahibalo sa nagkalain-laing aspeto sa digital technology pinaagi sa libre nga virtual seminars ug mga presentasyon gikan sa mga resource speaker nga adunay kahibalo ug kasinatian sa maong natad.
Pormal nga giablihan ang kalihokan pinaagi sa mga mensahe sa suporta ug pagdasig nila Mayor Amie G. Galario ug City Vice Mayor Greizl Galario-Fernandez, nga nagpasiugda sa kamahinungdanon sa padayong pagkat-on ug pag-angkon og bag-ong mga kahanas nga makatabang sa mga lumulupyo sa pag-atubang sa nag-uswag nga digital nga panahon.
Mitambong ug mipadayag usab sa iyang suporta si kanhi Bise Mayor Glen “Aboy” G. Galario, nga midugang sa mga mensahe sa pagdasig alang sa mga partisipante.
Gawas sa mga lektura ug presentasyon, gipadugang usab sa programa ang nagkalain-laing libreng serbisyo alang sa mga nitambong. Alang sa unang 100 ka partisipante nga sayong nakaabot sa venue, gitanyag ang libreng paniudto. Gitanyag usab ang libreng masahe, manicure, pedicure, ug tupi, samtang gipang-apod-apod usab ang mga libreng bitamina isip dugang nga suporta alang sa kahimsog sa mga partisipante.
Ang maong kalihokan nagpakita sa padayong paningkamot sa Kagamhanang Lokal sa Valencia City nga mapalapad ang access sa mga lumulupyo ngadto sa kahibalo, digital nga mga kahanas, ug praktikal nga serbisyo nga makatabang sa ilang adlaw-adlaw nga panginahanglan.
PIAD | Jay Fernandez-Ara
Photos | Emon Selorio