Nasabat sa mga awtoridad ang gibanabanang P573,000 nga balor sa gituohang puslit nga sigarilyo sa gihimong joint seaborne operation sa baybayon nga bahin sa Sitio Tehem, Barangay Townsite, Maluso, Basilan niadtong Septiyembre 29, 2026.
Gihimo ang operasyon human nakadawat og report gikan sa usa ka concerned citizen bahin sa pipila ka wala mailhing mga indibidwal nga gikatahong nagkarga ug nagpagawas sa mga kahon sa sigarilyo sa maong lugar.
Apil sa operasyon ang Maluso Municipal Police Station, Basilan MARPSTA, 2nd Provincial Mobile Force Company ug Bureau of Customs-Isabela, Basilan.
Nabantayan sa operating team ang usa ka motorized banca nga adunay mga sakay samtang daw nagpagawas og kargamento sa baybayon. Sa pagkamatikod sa mga awtoridad nga nagpadulong, mikalagiw ang mga sakay sa banca paingon sa mabaw nga bahin sa bakhawan, samtang ang mga tawo nga anaa sa baybayon midagan paingon sa mainland Maluso.
Sa pag-inspeksyon sa lugar, nakit-an ang pipila ka kahon sa sigarilyo nga gituohang gipuslit pagsulod sa nasod. Walay ning-angkon sa mga kontrabando ug walay napakitang tukmang dokumento, permit o pamatuod sa legal nga pag-import niini.
Napulo ka master case o katumbas sa 500 ream sa Astro Red cigarettes ang nakumpiska, nga gibanabanang nagkantidad og P573,000.
Gikustodiya na sa Basilan MARPSTA ang mga nakumpiskang sigarilyo alang sa tukmang dokumentasyon ug disposisyon, samtang gikonektar kini sa posibleng paglapas sa Republic Act No. 10863 o Customs Modernization and Tariff Act.
Source: StarFM Cotabato