Gibana-banang mukabat sa 9-milyones pisos nga kantidad sa mga gipalusot nga sigrilyo nga nakumpiska kagahapong adlawa samtang gisakay sa duha ka Mitsubishi L300 van sa may Barangay Pinamanculan ning syudad sa Butuan.
Kini human sa nahitabong ginukdanay sa mga personahe sa Highway Patrol Group kon HPG-Caraga, Anti-Smoking Task Force sa Community Environment and Natural Resources kon CENRO ug sa Butuan City Police Station kon BCPS-3, dihang misutoy pagdagan ang nababagan nila nga mga vans nga kargado og smuggled cigarettes gikan sa lungsod sa Buenavista, Agusan del Norte.
Sumala ni Kagawad Alheinxer Hermoso sa Brgy. Pinamanculan ning siyudad sa Butuan, gikan sa Buenavista mi-abot hangtod sa Purok 4B, Sitio Kinabutuan sa ilang barangay ang paggukod sa mga otoridad.
Sulod sa usa ka sakyanan ang 50 ka kahon sa mga sigarilyo kondiin ang matag-kahon duna’y sulod nga 10-mil ka mga sigarilyo.
Dugang pa ni Kagawad Hermoso, sakay sa matag-van ang driver ug pahinante kondiin tulo ang misibat padulong sa kalasangan sa ilang barangay hinungdan nga gipabuthan pa og warning shot apan wala na ma-abtan.
Sa pagkakaron, anaa na sa kustodiya sa kapulisan ang maong van ug ang mga kargang smuggled nga sigarilyo samtang gipahugtan na usab sa kapulisan ang pagbantay sa tanang dalan aron mapugngan ang pagsulod sa ilegal nga sigarilyo dinhi sa syudad.
Source: Bombo Radyo Butuan