Giklaro ni Carlo Boneto Becera, Information Officer II sa Office of the Civil Defense kon OCD-Caraga, nga ang pagpa-ilalom sa state of calamity sa tibuok probinsya sa Agusan del Sur resulta sa epekto sa krisis sa sektor sa agrikultura ug kakulang sa suplay sa tubig.
Sumala ni Becera, nadawat na nila ang Sangguniang Panlalawigan Resolution No. 585-26 gikan sa Agusan del Sur kansa nagdeklara sa province-wide state of calamity.
Tungod niini, ang Agusan del Sur na ang ikaduhang probinsya sa Caraga nga mihimo sa maong deklarasyon, human sa Dinagat Islands, samtang ang Butuan City ug Municipality of Carmen nakadeklara na usab og state of calamity.
Sigon ni Becera, lahi ang nahitabo sa Agusan del Sur tungod kay mismong ang provincial government man ang mihimo sa deklarasyon, subay sa rekomendasyon sa Provincial Disaster Risk Reduction and Management Council. Butuan City News
Mukabat sa 36.4 porsyento sa agricultural commodities sa Agusan del Sur ang naapektuhan, samtang hapit tanang component LGUs ang nakasinati og kakulang sa potable water tungod sa 31.4 porsyentong pagkunhod sa water availability sa watershed.
Na-apektuhan usab ang pipila ka importanteng serbisyo ug lifelines, lakip ang food supply chain ug suplay sa kuryente, nga misamot sa mga kalisdanan nga giatubang sa mga komunidad sa probinsya.
Source: Bombo Radyo Butuan