Gikumpirma ni PMajor Fritzcel Cubillan- station commander sa Butuan City Police Station-2 sa eksklusibong pakighinabi sa Bombo Radyo Butuan, nga nakabsan sa kinabuhi pasado alas 4:00 sa hapon kagahapon ang biktima sa pagpamusil nga natigayon sa milabay nga gabii sa may may fish landing area sa Langihan Public Market nga nahimutang Purok-2, Barangay Holy Redeemer, Butuan City.
Ang biktimang si Nelson Belmonte Durico, 47-anyos, alyas Dodong, minyo og residente sa maong dapit, namatay samtang padayong gitambalan sa ospital samtang anaa na sa luwas nga kahimtang ang 17-anyos nga pag-umangkon sa iyang asawa kinsa na-igo usab sa iyang walang bukton.
Gisaysay ni Cubillan nga pasado alas 8:20 sa gabii sa dihang nahitabo ang pagpamusil human mi-abot ang biktima kauban ang iyang asawa sa maong lugar aron mu-adto sa ilang tindahan.
Dihang nakanaog na sa motorsiklo ang asawa ug musunod na unta ang biktima, kalit nga mi-abot nga single motor nga walay plate number diin sakay ang duha ka mga lalaki, kondiin gipusil sa angkas ang biktima sa tulo ka higayon nga miigo sa li-og ug likod niini samtang naigo usab ang minor-de-edad sa wala nga bukton.
Narekober sa nahitaboan ang duha ka basyo sa bala og usa ka bala sa wala pa mailang klase sa armas.
Dugang pa ni Cubillan, padayon ang ilang lawom nga imbestigasyon aron ma-ila ug madakpan ang mga responsable ug masuta ang motibo sa kremin.
Source: Bombo Radyo Butuan