Nasakmit sa hiniusang operasyon sa mga awtoridad ang gidudahang shabu nga adunay standard drug value nga kapin P3.6 milyon sa buy-bust operation sa Barangay Masolun, Taraka, Lanao del Sur, pasado alas-12:45 sa udto niadtong Oktubre 15, 2026.
Naaresto sa operasyon si alyas “Jam,” 33 anyos, residente sa Barangay Dilausan, Maguing, Lanao del Sur.
Sumala sa taho sa Police Regional Office-Bangsamoro Autonomous Region (PRO-BAR), napulo ka plastic sachet nga adunay gidudahang shabu, nga may kinatibuk-ang gibug-aton nga 533.7 gramos, ang nasakmit gikan sa suspek.
Gibanabana nga mokabat sa P700,000 ang lokal nga kantidad sa nakumpiskang droga, samtang miabot sa P3,629,160 ang standard drug value niini.
Narekober usab gikan sa suspek ang usa ka Android cellphone, identification card ug usa ka tinuod nga P1,000 nga gigamit isip buy-bust money.
Gipangulohan sa Philippine Drug Enforcement Agency (PDEA) sa Lanao del Sur ang operasyon, uban sa nagkadaiyang yunit sa kapulisan ug mga ahensiya nga nagpatuman sa balaod.
Gidala ang suspek ug ang mga nakumpiskang ebidensiya sa buhatan sa lead operating unit alang sa hustong dokumentasyon ug dugang imbestigasyon.
Source: StarFM Cotabato