Upat ka lalaki ang nadakpan sa managlahing operasyon sa kapulisan sa Bukidnon, tungod sa mga kasong murder, homicide tungod sa pagpasagad, ilegal nga droga ug ilegal nga paghupot og armas.
Lakip sa mga nadakpan si Grego Minangga alyas Rodrigo Minangga Guyon, 56 anyos, nga giilang Top 3 most wanted person sa probinsiya ug Top 1 most wanted sa Talakag. Gidakop kini sa Sitio Awra, Barangay Dansolihon, Cagayan de Oro City, tungod sa kasong murder nga walay piyansa.
Nadakpan usab si Marcelino Denopol Baranggan, 38 anyos, sa Quezon, Bukidnon tungod sa reckless imprudence resulting in homicide ug damage to property, nga adunay P20,000 nga piyansa.
Sa Malaybalay City, usa ka 56-anyos nga lalaki ang gidakop sa buy-bust operation, diin nasakmit ang gituohang shabu nga motimbang og 4.074 gramos ug nagkantidad og P27,703.
Samtang, usa ka 27-anyos nga lalaki ang gidakop sa Maramag human makit-an sa iyang motorsiklo ang hinimo sa kamot nga shotgun, usa ka magazine ug tulo ka bala.
Source: Bombo Radyo Bukidnon