Nakaplagang patay ang usa ka 52-anyos nga caretaker sa gawas sa iyang payag sa Purok 2, Barangay Kiabo, lungsod sa Malitbog, Bukidnon, sa hapon niadtong milabay’ng adlaw, diin nakita sa iyang lawas ang samad sa tangkugo.
Giila ang namatay sa alyas “Eboy,” lumulupyo sa Purok 2, Claveria, Misamis Oriental.
Base sa inisyal nga imbestigasyon sa kapulisan, miadto ang biktima sa usa ka silingan sa hapon niadtong milabay’ng adlaw og nakig-inom sa tag-iya niini ug duha pa ka lalaki. Miapil usab siya sa ilang pag-inom sa wala pa mipauli sa iyang payag pasado alas-7:00 sa gabii.
Pagkasunod adlaw, mibisita sa uma ang tag-iya sa yuta ug ang iyang bana, diin ilang nakita ang biktima nga naghigda sa gawas sa payag, wala nay kinabuhi ug adunay samad sa tangkugo.
Gireport sa usa ka opisyal sa Barangay Kiabo ang maong hitabo ngadto sa Malitbog Municipal Police Station aron maimbestigahan.
Sa pagkakaron nagpadayon ang lawom nga imbestigasyon sa kapulisan aron matino ang hinungdan sa kamatayon ug mailhan ug madakpan ang posibleng responsable sa maong insidente.
Source: Bombo Radyo Bukidnon