Mokabat sa P9.85 milyones ang kantidad sa mga gidudahang gipalusot nga sigarilyo nga nasakmit sa kapulisan atol sa operasyon sa Barangay Tandiong Muslim, Alicia, Zamboanga Sibugay, diin duha ka lalaki ang gidakop.
Sumala sa taho, mikabat sa 250 ka master cases sa sigarilyo ang nasakmit sa mga awtoridad, lakip ang duha ka closed van nga giingong gigamit sa pagbiyahe sa mga kontrabando.
Gidala sa kustodiya sa Criminal Investigation and Detection Group (CIDG) ang mga nasakmit nga sigarilyo ug uban pang ebidensiya alang sa dugang nga imbestigasyon ug angay nga disposisyon.
Kabahin kini sa gipakusog nga kampanya sa Philippine National Police (PNP) batok sa ilegal nga pagsulod ug pagbaligya sa mga produkto nga mahimong makaapekto sa lehitimong negosyo ug sa koleksiyon sa buhis sa gobyerno.
Source: StarFM Cotabato