Gipahigayon ang Groundbreaking Ceremony alang sa concreting sa Junction Barangay Guinoyuran Provincial Road paingon sa Sitio Migtulod, Barangay Mt. Nebo Farm-to-Market Road niadtong Oktubre 26, 2026, nga nagtimaan sa pagsugod sa proyekto nga nagtumong sa pagpaayo sa maong dalan ug pagsuporta sa produksyon sa agrikultura ug kalamboan sa mga komunidad.
Sa iyang mensahe, gipahayag ni Mayor Amie Galario ang importansiya sa maong proyekto sa pagpaayo sa transportasyon sa mga produktong pang-agrikultura ug paghatag og mas maayong koneksiyon sa mga komunidad. Gilaom nga pinaagi sa maong imprastraktura, mapadali ang pagdala sa mga produkto ngadto sa merkado, maminusan ang kalisod sa pagbiyahe, ug mapalambo ang panginabuhian sa mga mag-uuma ug residente.
Ang proyekto adunay gitas-on nga 8.30 kilometros ug total contract cost nga ₱209,004,855.53 ubos sa Philippine Rural Development Project (PRDP). Gibahin ang pondo niini ngadto sa 70 porsiyento gikan sa World Bank nga nagkantidad og ₱146,303,398.87, 10 porsiyento gikan sa Government of the Philippines nga mokabat og ₱20,900,485.55, ug 20 porsiyento nga LGU equity nga nagkantidad og ₱41,800,971.11.
Atol sa programa, mihatag usab og mensahe ug suporta si Jose Apollo Pacamalan, Regional Executive Director sa Department of Agriculture Region X, samtang si Vice Mayor Greizl Galario-Fernandez mihatag og mensahe sa hagit alang sa pagpatuman sa proyekto. Naghatag usab og mga mensahe sa suporta si Councilor Alfredo “Boy” Laviña, Committee Chair sa Infrastucture, si Renato Abella, Punong Barangay sa Guinoyuran, si Luchie Bacolo, Punong Barangay sa Mt. Nebo, ug ang representante sa kontraktor nga mao ang Jejor’s Construction Corp.
Nagpadayon ang Lokal nga Pangagamhanan sa Valencia ubos sa pagpangulo ni Mayor Amie Galario, kauban ang ika-10 Sangguniang Panlungsod nga gipangulohan ni Vice Mayor Greizl Galario-Fernandez, sa pagpalambo sa imprastraktura nga mosuporta sa agrikultura ug sa panginahanglan sa mga residente, subay sa tumong nga “Linaw, Hapsay, ug Bibo nga Dakbayan sa Valencia.” AAR
Photos: Carl Tradz