Gipahigayon ang Breast Cancer Awareness Forum niadtong Oktubre 16, 2026, sa The Veranda, Barangay Casisang, Malaybalay City, Bukidnon aron mapalambo ang kahibalo sa breast cancer ug kamahinungdanon sa sayong pag-ila niini.
Gitambongan ang kalihokan sa mga babayeng representante gikan sa nagkalain-laing opisina sa City Government of Malaybalay, lakip ang Malaybalay City Breast Cancer Warriors (MCBCW).
Gipaambit ni Dr. Cosette S. Galve-Hanson, Obstetrician-Gynecologist, ang mga impormasyon bahin sa mga timailhan sa breast cancer, breast self-awareness, ug kamahinungdanon sa tukmang medical consultation ug screening. Gisuportahan ang kalihokan nila Dr. Nena Rose Sion, Dr. Jude Rey C. Pagaling, ug Frances Charmaine A. Lazalita, RN, Cancer Prevention and Control Program Nurse Coordinator.
Usa sa mga bahin sa forum ang testimonya sa usa ka breast cancer survivor nga naghatag og inspirasyon ug nagpakita sa kamahinungdanon sa paglaom ug suporta sa pag-atubang sa sakit. Gipahigayon usab ang question-and-answer session aron matubag ang mga pangutana ug matul-id ang mga sayop nga pagtuo bahin sa breast cancer.
Pinaagi sa maong kalihokan, gidasig ang mga babaye nga mahimong aktibo sa pag-atiman sa ilang panglawas, magpakonsulta dayon kon adunay dili kasagarang kausaban sa suso, ug ipaambit ang tukmang impormasyon sa ilang pamilya ug komunidad.
Report: Mhegan L. Dominguez, CHO-NADA
