Malampusong naluwas ug gibalik sa kinaiyahan ang usa ka batan-ong serpent eagle human masangit sa pukot duol sa usa ka puy-anan sa Purok 2, Barangay Sinanglanan, Malaybalay City.
Nakit-an ug giluwas ang langgam niadtong Oktubre 28, 2026, ni Jimber Equibal, residente sa maong lugar, kinsa mihangyo og tabang sa City Environment and Natural Resources Office (City ENRO).
Dali usab nga mitubag ang City ENRO ug nakig-alayon sa DENR Community Environment and Natural Resources Office (CENRO) Valencia City aron madala ang langgam sa Bukidnon Provincial Zoological Park alang sa pagsusi sa kahimtang niini.
Nakaplagang maayo ang panglawas sa serpent eagle, wala usab nakita nga samad ug kompleto ang duha ka pako niini.
Niadtong Oktubre 29, malampusong gibuhian kini sa duol sa lugar diin kini na-rescue, pinaagi sa hiniusang paningkamot sa City ENRO personnel, Forest Patrollers ug DENR-CENRO Valencia City.
Source: Bombo Radyo Bukidnon