Gipalig-on sa Police Regional Office 10 (PRO 10) ug Department of Education (DepEd), Division of Cagayan de Oro City, ang ilang panag-uban alang sa pagpanalipod sa mga bata ug pagsiguro sa mas luwas nga palibot sa mga eskwelahan.
Gidawat ni PBGen Nestor C Babagay Jr., Regional Director sa PRO 10, si Dr. Derrold Marl S. Aves, Senior Education Program Specialist for Human Resource Development sa DepEd Division of Cagayan de Oro City, atol sa iyang pagbisita karong adlawa, Martes, Nobyembre 3, 2026 sa Camp 1Lt Vicente G. Alagar, Lapasan, Cagayan de Oro City.
Atol sa ilang panag-istoryahanay, gihisgutan ang umaabot nga Third Regional Assembly of Educational Leaders (RAEL) nga ipahigayon sa Nobyembre 24 hangtod 26, 2026, sa The Atrium, Limketkai Center, Cagayan de Oro City.
Gipahibalo usab sa DepEd ang ilang hangyo nga maghatag ang PRO 10 og resource speaker nga mopresentar mahitungod sa pagpatuman sa balaod ug pagpanalipod sa mga bata, ilabina sa hustong pagdumala ug pagtubag sa mga kaso nga naglambigit sa mga menor de edad.
Tumong niini nga panag-uban nga mas mapalig-on ang koordinasyon tali sa kapulisan ug sektor sa edukasyon, ingon man mapalambo ang kahibalo sa mga lider sa edukasyon bahin sa hustong mga lakang nga angay buhaton kon adunay mga insidente o kaso nga naglambigit sa mga bata.
Pinaagi niini, gilauman nga mas maandam ang mga lider sa eskwelahan sa pag-atubang sa mga isyu nga may kalabotan sa kaluwasan ug katungod sa mga estudyante, subay sa mga balaod ug polisiya sa pagpanalipod sa kabataan.
Gipasiugda usab sa maong inisyatiba ang kamahinungdanon sa panagtambayayong sa kapulisan ug mga institusyong pang-edukasyon aron malikayan ang pagpang-abuso, maprotektahan ang mga kabataan ug masiguro nga ang matag eskwelahan mahimong luwas nga lugar alang sa pagkat-on.
Ang pagpanalipod sa mga bata responsibilidad sa tanan. Pinaagi sa lig-on nga panag-uban sa kapulisan ug sektor sa edukasyon, mas mapalig-on ang paningkamot sa pagseguro sa kaluwasan ug kaugmaon sa matag kabatan-onan.