Nasamdan ang usa ka 45-anyos nga drayber sa motorsiklo ug ang iyang 48-anyos nga asawa human mabangga sa usa ka Kia Bongo nga kalit nga miligid paingon sa karsada sa Sayre Highway, Barangay Kalasungay, Malaybalay City, Bukidnon, alas-8:40 sa gabii niadtong Nobyembre 2, 2026.
Base sa imbestigasyon sa Malaybalay City Police Station, nagbiyahe paamihanan ang Honda CFT125 nga motorsiklo nga gimaneho sa 45-anyos nga lalaki gikan sa Dangcagan dihang nabanggaan kini sa Kia Bongo nga giparking sa usa ka construction company. Gipaandar sa 20-anyos nga drayber ang makina sa Kia aron iparking kini sa hustong lugar, apan kalit kining mi-andar mitabok sa highway ug naigo ang tuo nga bahin sa motorsiklo. Naipit ang motorsiklo ilalom sa atubangang bahin sa Kia, nga mipadayon sa paglihok hangtod nabangga sa steel barrier sa tunga sa highway.
Gidala sa Malaybalay Emergency Rescue Unit ang magtiayon sa Bukidnon Provincial Medical Center alang sa pagtambal. Samtang, gidala sa police station ang duha ka drayber alang sa hustong disposisyon. Wala usab lisensiya sa pagmaneho ang 20-anyos nga drayber sa Kia. Nagmando ang Bukidnon Police Provincial Office sa Malaybalay CPS nga pahugtan ang pagpatuman sa mga balaod sa trapiko ug magpahigayon og kalit nga checkpoints aron malikayan ang susamang aksidente.
Source: Bombo Radyo Bukidnon