Malinawon ug hapsay nga nahitabo ang pagsaulog sa All Saints’ Day ug All Souls’ Day sa tibuok rehiyon sa Northern Mindanao, sumala sa report sa Police Regional Office 10 (PRO 10) niadtong Nobyembre 2, 2026.
Base sa monitoring sa Regional Tactical Operations Center (RTOC), mikabat sa 679,129 ka mga tawo ang mibisita sa nagkadaiyang sementeryo sa Northern Mindanao gikan Oktubre 30 hangtod Nobyembre 2, alas 3:00 sa hapon. Gikan niini, 300,129 ka bisita ang natala atol sa monitoring niadtong Nobyembre 2.
Gawas sa pagdumala sa daghang tawo ug paghatag og tabang sa publiko, nagpadayon usab ang mga kapulisan sa pagpatuman sa mga inspeksyon sa mga sementeryo ug uban pang lugar nga daghang tawo ang nagtigom.
Sa maong operasyon, mikabat sa 413 ka mga gidili ug kontrabando nga mga butang ang nasakmit sa kapulisan. Lakip niini ang mga gamit sa pagluto, lighter, mga armas nga hait, ilimnong makahubog ug sigarilyo.
Bisan pa sa kinatibuk-ang malinawong pagsaulog, adunay nahitabong kalampusan ang kapulisan sa ilang operasyon sa Valencia City, Bukidnon, diin nadakpan ang usa ka 39-anyos nga lalaki alas 7:55 sa buntag niadtong Nobyembre 2 sa Old Public Cemetery, Barangay Poblacion.
Nadakpan ang suspek human boluntaryo niyang giablihan ang iyang abohon nga belt bag alang sa inspeksyon. Atol sa pagsusi, nahulog sa yuta ang usa ka transparent plastic nga adunay gibana-banang tulo ka gramo sa gidudahang uga nga dahon sa marijuana.
Ang nasakmit nga substansiya adunay gibanabanang Standard Drug Price nga P360.00. Gidala ang suspek ngadto sa Valencia City Police Station uban sa nasakmit nga ebidensya alang sa hustong dokumentasyon ug legal nga proseso tungod sa posibleng paglapas sa Republic Act No. 9165 o Comprehensive Dangerous Drugs Act of 2002.
Samtang, sumala sa pinakabag-ong monitoring, walay naitalang insidente nga may kalabotan sa UNDAS sa tibuok rehiyon.
Gipasalamatan ni PBGen Nestor C Babagay Jr., Regional Director sa PRO 10, ang dedikasyon sa mga kapulisan, pakigtambayayong sa nagkalainlaing ahensya sa gobyerno ug lokal nga pangagamhanan, ingon man ang kooperasyon sa publiko nga nakatampo sa malinawong pagsaulog sa Undas 2026.
Matod pa niya, nagpakita kini sa hiniusang paningkamot sa tanan aron masiguro ang kaluwasan sa publiko. Gidayeg usab niya ang mga kapulisan, partner agencies, force multipliers ug ang katawhan tungod sa ilang kooperasyon.
Gipasalig usab sa PRO 10 nga magpadayon ang ilang paningkamot sa pagpanalipod sa komunidad ug pagmintinar sa kalinaw ug kahapsay sa tibuok Northern Mindanao.
Ang malinawong UNDAS 2026 usa ka pagpamatuod nga pinaagi sa panaghiusa, disiplina ug kooperasyon, masiguro ang kaluwasan sa matag lungsoranon.