Tulo ka operasyon sa kapulisan ang miresulta sa pagdakop sa mga suspek sa ilegal nga pagpabuto og armas, mga kaso sa seksuwal nga pang-abuso ug ilegal nga droga sa Bukidnon niadtong Nobyembre 5 ug 6, 2026.
Gidakop sa Cabanglasan Police ang 49-anyos nga lalaki human gikatahong mipabuto og armas atol sa panaglalis nila sa iyang asawa sa Barangay Mandahican.
Narekober gikan kaniya ang usa ka caliber .357 revolver nga adunay usa ka basyo ug lima ka buhing bala.
Samtang, nadakpan sa Manolo Fortich ang 38-anyos nga si Elder Dave Mensedor Purisima, ikaduhang most wanted person sa probinsya, tungod sa unom ka counts sa qualified rape, 4 counts sa qualified sexual assault ug 6 counts sa acts of lasciviousness.
Dugang pa, duha ka lalaki ang nadakpan sa buy-bust operation sa Barangay Sagbayan, Dangcagan, diin nakompiska ang 13.59 gramos nga gituohang shabu nga nagkantidad og 92 mil 412 pesos.
Ang tanang nadakpan anaa na sa kustodiya sa kapulisan alang sa tukmang dokumentasyon ug legal nga proseso.
Source: Bombo Radyo Bukidnon