Nasakmit sa mga otoridad ang 300 ream sa gidudahang smuggled nga sigarilyo nga nagkantidad og P240,000 human madiskubre kini sa mga tagong compartment sa usa ka van atol sa checkpoint sa Barangay Samburon, Linamon, Lanao del Norte.
Nahitabong ang pagsita pasado alas-2:40 sa hapon niadtong Nobyembre 6, 2026, dihang gisusi sa mga otoridad ang usa ka Toyota Hiace van ug namatikdan ang giusab nga kisame ug mga lingkoranan nga adunay gitagong mga espasyo. Sa gihimong inspeksyon, nakuha ang unom ka master case sa Bosqu cigarettes nga katumbas sa 300 ream.
Gipahigayon ang operasyon sa 1st Provincial Mobile Force Company sa Lanao del Norte Police Provincial Office, kauban ang ubang yunit sa kapulisan ug mga otoridad sa maritime security.
Wala makapakita ang drayber og tukmang mga dokumento alang sa maong mga sigarilyo, hinungdan nga gidala kini sa Linamon Municipal Police Station alang sa dokumentasyon ug profiling sa dili pa i-refer sa Bureau of Customs.
Anaa karon sa kustodiya sa 1st PMFC ang nakumpiskang mga sigarilyo ug ang van samtang gihulat ang pormal nga turnover niini sa Bureau of Customs
Samtang, gipasalig sa Police Regional Office 10 ubos sa pagpangulo ni PBGEN Nestor C. Babagay Jr. ang padayon nga pagpalig-on sa mga operasyon sa checkpoint ug koordinasyon sa mga hingtungdang ahensya aron mapugngan ang pagsulod ug pag-apod-apod sa mga ilegal nga produkto.
Source: StarFM Cotabato