Gisaulog sa City Health Office (CHO) sa Lokal nga Panggamhanan sa Tagum ang World Diabetes Day 2026 sa temang “Lihok na, Kontrola ang Diabetes! DiaBeat It!” nga gipahigayon niadtong Nobyembre 14, 2026, sa Barangay Liboganon Gym, Tagum City, Davao del Norte.
Kabahin sa kalihukan ang healthy cooking demonstration, physical activities, diabetes screening, general consultation, Eye ug Dental screening, HIV screening, Chest X-ray, Laboratory services, libreng tambal, ug uban pang serbisyong panglawas.
Naghatag usab og lecture kabahin sa diabetes si Dr. Krist Angelo Almario isip resource speaker aron mapalapdan ang kahibalo sa komunidad mahitungod sa paglikay ug pagkontrolar sa maong sakit.
Gipasiugdahan usab ang programa nga “Tutukan ang Diabetes” alang sa padayong pagmonitor sa mga diabetic, lakip na ang paglunsad sa Diabetes Club of Tagum nga unang gisugdan sa Barangay Liboganon.
Mingtambong sa maong kalihukan sila City Councilor Ciara Isabelle Uy-Salazar, Barangay Captain Catherine D. Ballesteros, ug mga representante sa Tagum City Council of Women Foundation, Inc. ug City Health Office (CHO) nga naghatod sa ilang suporta sa mga benepisyaryo.
Dugang pa, dako usab ang suporta sa Philippine Association of Medical Technologists, Inc. – Davao del Norte Chapter, USEP School of Medicine, Tagum Doctor’s College, ug Tagum Optometric Society alang sa maong aktibidad.
