Nagpasidaan si PBGen Christopher N. Abrahano, Acting Regional Director sa National Capital Region Police Office (NCRPO), batok sa mga indibidwal nga mosamantala sa 49th ASEAN Summit aron mohimo og ilegal nga mga kalihokan, magsamok sa kahusay, ug magbutang sa peligro sa kaluwasan sa publiko.
Misunod kini sa mga protesta sa Metro Manila nga miresulta sa pagkadakop sa tulo ka indibidwal sa Taguig City niadtong Nobyembre 13, 2026; walo ka indibidwal sa Liwasang Bonifacio, Manila; ug kapin sa 200 ka indibidwal sa Sucat, Muntinlupa City, niadtong Nobyembre 15, 2026.
Gipasiugda ni PBGen Abrahano nga gitahod sa NCRPO ang katungod sa mga lungsoranon sa malinawong pagpundok, apan dili niini tugotan ang kapintasan, paglapas sa balaod, ug pagpanghilabot sa lehitimong operasyon sa kapulisan.
Gikumpirma usab niya nga 15 ka pulis ang nasamdan atol sa komprontasyon sa Liwasang Bonifacio, apan nakadawat na sila og medikal nga pag-atiman ug nakabalik na sa ilang katungdanan.
Gimandoan niya ang lima ka police district director nga siguruhon nga ang tanang operasyon ug pagdakop adunay ligal nga basihanan, samtang padayong gitahod ang mga katungod sa publiko.
Gipasiguro usab sa NCRPO nga magpabiling alerto ang ilang mga personahe aron mapadayon ang kaluwasan ug kahapsay sa Metro Manila samtang gipahigayon ang ASEAN Summit.
“We will not back down from our duty to enforce the law. We will respect peaceful dissent, but we will be firm against lawlessness. No individual or group is above the law, and the importance of this international event makes our responsibility to maintain peace and order even greater,” sigun ni PBGen Abrahano.
Source: National Capital Region Police Office